قوة الحب ...وضعفه

**امير الغرام** السبت يوليو 26, 2008 8:56 am

هاي عليكو يا أحلى مملكة

ندخل في الموضوع على طوووووووول
بما إني إشتركت في مسابقة روميو وجولييت
ومطلوب أناقش بنفسي موضوع عن الحب
فكرت أناقش موضوع محيرني فعلا في الحب

ياترى الحب قوة ولا ضعف؟!
كتير قعدت أفكر مع نفسي في إجابة السؤال ده
بس لقيت إن كل مشاهد الحب إلي شوفتها في حياتي سواء في الواقع أو الأغاني أو الأفلام بتثبت إن الحب ضعف بكل المقاييس سواء كان من طرف واحد أو متبادل بين الطرفين..

عشان كده أنا رأيي إن الحب ضعف
أو بمعنى أصح..ممكن أقول
الحب أقوى مخدر يضعفنا

وقولت أجيبلكم كام مشهد من مشاهد الضعف في الحب إللي أثرت فيا جامد..

هي مشاهد الضعف في الحب كتير جداااا طبعا..بس أنا إخترتلكم عشر مشاهد

أول مشاهد الضعف في الحب:
لا قرار في الحب
قوة الحب ...وضعفه 023

(أحبك مهما يكن قرارك)

الجملة دي قالتها البطلة في فيلم قديم مش فاكرة إسمه لما البطل ليوناردو ديكابريو قالها إنه مش بيحبها قالتله: (أحبك مهما يكن قرارك)

الجملة دي أثرت فيا أوي..أنا مش فاكرة هما قالوا إيه في باقي المشهد لإني سرحت مع الجملة دي لدرجة إني خليتها جملة إستفتاحية لشعر أنا كتبته... (أحبك مهما يكن قرارك.. برفضك أو بإصرارك برحيلك أو بإنتظارك......دي كانت بداية الشعر إلي كتبته وأنا عندي 17 سنة )

ياه قد إيه بتحس بالضعف لما يكون حبك لحبيبك مالكش قرار فيه ولا حتى لحبيبك نفسه قرار فيه..

وياسلام على الست أم كلثوم لما قالت:
(وإن كنت أقدر أحب تاني هحبك أنت)

يعني حتى لو القرار بإيدينا بردو مش عايزين نحب غير حبايبنا

تاني مشاهد الضعف في الحب:
الحب ضعف في النظر
قوة الحب ...وضعفه 006

( إننا لا نرى أحبائنا على حقيقتهم..ولكن نراهم كما نتمنى)

الجملة دي قالتها البطلة إلينا في الجزء التاني من فيلم زورو..
عجبتني أوي الجملة دي وفكرت مع نفسي فيها حسيت عندها حق أوي بدليل إنك ممكن تتحب شخص تشوفه كل حاجة وإنسان ماحصلش وكل الناس شايفينه إنسان عادي

أو مثلا تلاقي صديقك بيحب شخص شايفه كل حاجه وإنسان ماحصلش وأنت شايفه إنسان عادي.. تحس إن إللي بيحب فعلا" عامل زي مايكون مسحور في غشاوة على عينه

تالت مشاهد الضعف في الحب:
الحب ضعف لأنه يجعلك كالأسير
قوة الحب ...وضعفه 154

(لما أشعر أنك ستأسريني في كل مرة آراك)

الجملة دي قالها البطل لحبيبته في فيلم tough luck لما حس إن هي بتحاول تخدعه للمرة التانية وحس إنه هيتخدع ويصدقها للمرة التانية.. قال لها (لما أشعر أنك ستأسريني في كل مرة آراك؟)

الجملة دي أثرت فيا أوي لدرجة إني خليتها جملة إستفتاحية لشعر تاني ليا

قد إيه بتحس بالضعف لما تحس إن حبيبك له سلطة على قلبك وإحساسك..يقدر يأسرك ويسحرك ويخدعك بسهولة

رابع مشاهد الضعف في الحب:
الحب ضعف..لإنه إستعمار دائم للروح يستحيل فيه الإستقلال..

إضغط على هذا الشريط هنا لعرض الصورة بكامل حجمها .

طبعا كلنا شوفنا فيلم تايتانيك.. وشوفنا روز لما ركبت مركب النجاة وسابت حبيبها جاك في السفينة وفي اللحظة إلي بتبعد فيها عنه وهي بتبصله..بصتله وهي حاسة إن روحها بتتسحب منها..ماقدرتش
طبعا ماتقدرش
يعني معقول هتنجو بجسدها وتسيب روحها في السفينة..نطت من المركب وجريت في السفينة تدور على روحها وحضنت حبيبها..حضنت روحها
يالهووووي ع المشهد ده..
ده كفاية إنك تشوفه هتحس بالضعف أومال لو عيشته هتحس بإيه؟

خامس مشاهد الضعف في الحب:
حتى لو كان جواك وحش..بردو هتكون ضعيف جدا في الحب عالأقل قدام حبيبك بس
قوة الحب ...وضعفه 141

من الأفلام إلي أثرت فيا أوي فيلم رعب وخيالي وفي نفس الوقت رومانسي أوووي لجوليا روبرتس كان البطل فيه بيتحول وحش وبيقتل الناس بس كان قدام حبيبته جوليا مابيقدرش يتحول وحش
كان بيخاف حبيبته تشوفه بالمنظر ده وهو وحش أو حتى تعرف إن جواه وحش..كان أول ما أعصابه بتتعب بيتحول وحش..وكان أول ما أعصابه تتعب يلمس إيديها عشان يهدى.. وفي مرة دخلت عليه فجأة وهو متحول وحش كان هيقتلها بس بمجرد ما لمس إيديها أعصابه هديت ورجع إنسان

يا لهووووووي قمة في الرومانسية
هو طبعا الفيلم خيالي جدا بس بيعبر عن فكرة واقعية هي إن الإنسان ضعيف جدا قدام حبيبه..وإن الحب له سلطة داخلية أقوى مننا وأقوى حتى من الوحش إلي جوانا يعني مثلا ممكن تشوف إنسان عصبي ومغرور وقليل الذوق..بس قدام حبيبه تلاقيه وديع وجنتل كأنه واحد تاني خالص

سادس مشاهد الضعف في الحب:
الحب ضعف في الجسد
قوة الحب ...وضعفه 077

وعلى رأي الشاعر إللي قال:
لا يعرف الحزن إلا من عشقا..وليس كل من قال إني عاشق صدقا
للعشاقين نحول يعرفون به..من طول ماحالفوا السهد والأرقا

وعلى رأي الست أم كلثوم بردو لما قالت:
كل ليلة وكل ساعة وكل يوم.. بعد ما أطمن عليك هيجيني نوم..ياحبيبي !!

سابع مشاهد الضعف في الحب:
الحب ضعف لإن جرحه ليس له دواء
قوة الحب ...وضعفه 028

(ماحدش بيتجرح أوي غير لما بيحب أوي)

الجملة دي قالها مصطفى شعبان في فيلم أحلام عمرنا.. فعلا" الكلام ده حقيقي..خصوصا" إن الإنسان بيكون حساس جدا" مع حبيبه..بيبقى حبيبه نفسه هو نقطة ضعفه
قوة الحب ...وضعفه 025

تامن مشاهد الضعف في الحب:
الحب ضعف لإنه يجعل إحساسك بين يدي إنسان آخر يقلبه كيف يشاء

مرة كنت قاعدة مع واحدة صاحبتي في الجامعة هي بتحب واحد هو مابيحبهاش
وكانت قاعدة بتحكيلي قد إيه هي مبسوطة عشان هتشوفه بكرا في حفلة التخرج بتاعته..
تاني يوم بسألها روحتي الحفلة وشوفتيه..قالتلي بحزن أيوه
قلتلها ومالك زعلانة ليه شكله شكله نكد عليكي الأحاسيس الحلوة
قالتلي جملة أثرت فيا أوي
قالتلي: ( لأ ..ده هو بروده خلاني ماأحسش بحاجة أصلا"..عارفة لما طفل يبقى عايز يتولد وأمه تقعد تخنق فيه عشان مايتولدش..هو ببروده خنق إحساسي وخلاه مايتولدش)
لا تعليق
قوة الحب ...وضعفه 29

تاسع وأسوأ مشاهد الضعف في الحب:
إن الحب قد يؤدي إلى ضعف الإيمان
للأسف في كتير لما بيحبوا لدرجة الجنون الحب بيلحس دماغهم تماما وبيوصل بيهم لدرجة العبودية شوية وهيعبدوا الإنسان إللي بيحبوه وممكن يعملوا حاجات أو يقولوا كلام يوقعهم في الشرك وليعوذ بالله

زي الشاعر (بلاش نذكر إسمه ربنا يستر على عبيده) إلي قال:
ماضر لو رحمت عاشقا".. باع الصلاة بقبلة من مبسم

إستغفر الله العظيم
أقول إيه بس!!
ربنا يسامحه ويغفرله..طبعا مش هاقول ربنا يهديه عشان هو خلاص مات

وفي شعراء كتير ليهم أبيات شعرية بيألهوا فيها المعشوق..ومابلاش أذكرها بردو أحسن..أخاف آخد ذنب إني نشرتها

بس في شاعر إسمه عبدالرحمن العشماوي بيقول بيت شعر جميل أووووي بيرد للحب عفته وطهارته:

يانبتة في رياض الحب سامقة..ياسر راحة إحساسي وإرهاقي
لا تحسبي أن حبي سوف يجعلني..أقر نفسي على عصيان خلاقي
:11:

عاشر وأصعب مشاهد الضعف في الحب:
الحب ضعف لإنك لاتستطيع التخلص منه حتى وإن أوهمت نفسك بأنك إستطعت
قوة الحب ...وضعفه 027

ممكن تنفصل عن حبيبك جسديا" لأي سبب من الأسباب..لكن مستحيل تقدر تنفصل عن حبيبك شعوريا" مهما كانت الأسباب

وعلى رأي الست أم كلثوم بردو لما قالت:
ده أنا حيرني هواك..وأنا علشان أنساك..
بهرب من أي مكان روحته ولو مرة معاك..
وبأغير أي كلام بيجيب سيرة لذكراك..
وأهرب من أقرب ناس يعرفوا قصتي وياك..
وصلتني للحال ده بإيدك..بعد ما كانت روحي في إيدك..
سيبتك ومافيش حد في عمري يشغل بعدك قلبي وفكري..
سيبتك من غير حتى ما أفكر هاقدر أو مش هاقدر؟
وأنا مش هاقدر
قوة الحب ...وضعفه 17

كلمة بنقولها كتير لما نحب:
مش هاقدر..مش قادر..ما أقدرش

وفي نهاية التوبيك هأختصر كلامي في جملة واحدة..نفس الجملة إللي إبتديت بيها..
الحب أقوى مخدر يضعفنا...

قوة الحب ...وضعفه 186

ياريت إلي يدخل يقول إيه رأيه:

الحب قوة ولا ضعف؟ وليه؟

وإيه أكتر مشهد بيعبر عن الضعف أو القوة في الحب شفته في حياتك سواء كان في الواقع أو في فيلم أو في أغنية؟

مع أرق تحياتي..امير الغرام
قوة الحب ...وضعفه 3